អារម្ភកថា

អូសូ អ្នកធ្វើបទអត្ថាធិប្បាយក្នុងសៀវភៅនេះ ចាត់ទុកជាបុគ្គលអច្ឆរិយៈម្នាក់ផ្នែកចិត្តវិញ្ញាណដែលប្រើភាសាបកស្រាយតាមវិធីដោយឡែកពីអ្នកដទៃ។ ហេតុនេះវាមិនចម្លែកទេដែលមានពាក្យចចាមអារ៉ាមពីអូសូក្នុងផ្លូវអវិជ្ជមានខ្លះបន្ទាប់ពីគេបានអានស្នាដៃរបស់អូសូ ប៉ុន្តែសម្រាប់អ្នកលើកសរសើរពីគំនិតថ្មីៗរបស់អូសូក៏មានមិនតិចដែរ ទើបធ្វើឱ្យគ្រឹះស្ថានម៉ាញប៊ុក្សយើងបានព្យាយាមបកប្រែស្នាដៃរបស់អូសូជូនចំពោះមិត្តអ្នកអានជាបន្តបន្ទាប់ ដែលតាមពិតប្រទេសផ្សេងៗលើពិភពលោកបានបកប្រែស្នាដៃរបស់គាត់ស្ទើរតែគ្រប់ភាគ ហើយបោះពុម្ពមុនប្រទេសកម្ពុជាយើងតាំងពីយូរឆ្នាំមកហើយ។

អូសូ ជាបុគ្គលម្នាក់ដែលហ៊ានចោទឆ្លើយជាសំណួរអំពីភាពជាមនុស្ស ហ៊ានបកស្រាយពីវិធីជួយឱ្យរកឃើញអ្វីដែលនៅពីក្នុងខ្លួន អ្វីដែលនៅក្នុងចិត្តពិតប្រាកដរបស់ខ្លួន ដែលមិនមែនជាការក្លែងបន្លំ ទៅតាមវិធីថ្មីដែលខុសពីអ្វីដែលមនុស្សភាគច្រើនធ្លាប់អនុវត្តកន្លងមកដើម្បីប្រើសក្តានុពលដែលមាននៅក្នុងខ្លួនបានជាអតិបរមាប្រកបដោយភាពច្នៃប្រតិដ្ឋនិងភាពជាម្ចាស់លើខ្លួនពិតប្រាកដ។ ដូច្នេះហើយទើបទស្សនៈរបស់អូសូមានលក្ខណៈជាសាកល មិនជាប់ជំពាក់នឹងសាសនាណាមួយ តែសម្របតាមដំបូន្មានណាដែលជួយឱ្យមនុស្សរំដោះខ្លួនផុតពីភាពអវិជ្ជាក្នុងធម្មជាតិ។

ពាក្យ”ឥស្សរភាព”ដែលបកស្រាយដោយលម្អិតដោយអូសូក្នុងសៀវភៅនេះនឹងជួយឱ្យអ្នកអានបានឃើញច្បាស់ពីភាពស៊ីជម្រៅរបស់គំនិតអ្នកនិពន្ធ, បានប្រៀបធៀបនឹងឥស្សរភាពដែលយើងម្នាក់ៗធ្លាប់គិតពីដើមមកថាតើវាខុសគ្នាដូចម្តេច។

ប៉ុន្តែយើងមានសំណូមពរម្យ៉ាង ពេលកំពុងអានសៀវភៅនេះ សូមប្រិយមិត្តដកគំនិត ទស្សនៈឬចំណេះដឹងចាស់របស់ខ្លួនទុកដោយឡែកចេញ តាំងខ្លួនប្រៀបដូចជាទកកន្លះកែវ បើកចំហចិត្តស្តាប់អ្វីថ្មីៗ ពេលនោះយើងជឿថាប្រិយមិត្តពិតជាបានទទួលពន្លឺផ្សេងៗបន្ថែមចូលមកនៅក្នុងឃ្លាំងចំណេះ ដែលអាចយកទៅប្រតិបត្តិឱ្យកើតជាប្រយោជន៍ដល់ជីវិតមិនលែងឡើយ។

សូមអរគុណសម្រាប់ការជួយគាំទ្រពីបណ្តាប្រិយមិត្តអ្នកអាននិងសូមអរគុណដល់សហការីម៉ាញប៊ុក្សគ្រប់គ្នា ដែលបានរួមសហការផលិតស្នាដៃជាបន្តបន្ទាប់រហូតទប់ជ្រែងឱ្យយើងអាចឈរបានមកទល់បច្ចុប្បន្ននេះ។

គឹម ចាន់ណា

Customer Reviews (0)