ព្រះពុទ្ធ ត្រូវបានសហគមន៍លោកទទួលស្គាល់ថាជាអ្នកប្រាជ្ញដ៏កំពូលមួយអង្គលើលោក។ ព្រះអង្គ បានត្រាស់
​ដឹង​អំពី​អរិយ​សច្ច​ទាំង៤ ដែលមានគោលការណ៍ឈរលើសច្ចធម៌ ធ្វើឲ្យព្រះពុទ្ធសាសនាក្លាយជាកំពូលទស្សន
វិជ្ជា ឈរលើហេតុផលបង្រៀនមនុស្សឲ្យជឿលើច្បាប់កម្មផល  ធ្វើល្អបានល្អធ្វើអាក្រក់បានអាក្រក់  ដែលនៅ
ក្នុងសង្គមយើងបច្ចុប្បន្ន  មានមនុស្សជាច្រើនស្ទើរតែភ្លេចពាក្យប្រៀនប្រដៅទាំងនេះអស់រលីងហើយ  ឬអាច
និយាយបានថា សាសនាចាប់ផ្តើមឃ្លាតកាន់តែឆ្ងាយពីក្នុងចិត្តមនុស្សបន្តិចម្តងៗនេះឯង។

មនុស្សជាច្រើនអាចនឹងដឹងថាខ្លួនកាន់ព្រះពុទ្ធសាសនា តែគេនៅមិនទាន់ដឹងទាល់តែសោះថា ព្រះពុទ្ធ
សាសនាគឺជាអ្វី? មានប្រយោជន៍ដូចម្តេចខ្លះ? នេះគឺជាហេតុផលដែលយើងគួរយក “ធម៌” មកបណ្តុះក្នុងចិត្ត
យុវជនជាបណ្តើរៗ ដើម្បីដល់គេធំឡើងនាពេលអនាគត គេអាចប្រើធម៌ឲ្យដឹកនាំជីវិត ធ្វើជាត្រីវិស័យជួយ
ចង្អុលប្រាប់ថា តើគួរដើរទៅតាមទិសណា ឬជាចង្កូតដែលនឹងដឹកនាំឲ្យទៅដល់គោលដៅនៃជីវិត។ ប៉ុន្តែការ
ដែលនឹងនាំគោលការណ៍ព្រះធម៌ទាំងឡាយយកមកបង្រៀនដល់ក្មេងៗក្នុងវ័យរបស់គេនេះ គឺពិតជាធ្វើឲ្យពួក
គេពិបាកនឹងយល់ណាស់ សូម្បីតែមនុស្សចាស់ៗដែលមានចំណេះដឹងយ៉ាងជ្រៅជ្រះទៅហើយ ក៏នៅតែមិន
អាចយល់ឲ្យដល់ទីជម្រៅនៃព្រះធម៌ផង ហេតុដូច្នេះទើប ប្រជុំរឿងជាតក គឺជាជម្រើសដ៏ល្អមួយក្នុងការឲ្យក្មេង
បានសិក្សាគោលការណ៍របស់ព្រះធម៌ក្នុងដំណាក់កាលដំបូងរបស់ពួកគេ។

ពេលខ្លះខ្លឹមសារក្នុងសៀវភៅនេះ អាចមានភាសាបាលីនៅលាយឡំ ដែលមើលទៅគួរឲ្យពិបាកស្វែងយល់
តែក៏ដើម្បីឲ្យគេបានស៊ាំនឹងភាសានេះបន្តិចម្តងៗ ព្រមទាំងមានសម្រាយអត្ថន័យគួបផ្សំជាមួយ បានទទួល
ទាំងចំណេះដឹង និងការកម្សាន្ត ដែលបណ្តុះទឹកចិត្តរបស់ក្មេងៗ ឬកូនចៅឲ្យជ្រួតជ្រាបបន្តិចម្តងៗ លុះពេល
គេធំឡើង គេក៏នឹងចេះទប់ចិត្តទប់គំនិត ស្គាល់ពីគុណនិងទោស ស្គាល់ពីច្បាប់កម្មផល ស្គាល់ពីអត្ថន័យនៃ
ពាក្យទាំងនេះ ជាអត្ថន័យដែលមនុស្សចាស់ៗដូចយើង ស្ទើរតែភ្លេចអស់ទៅវិញរលីងហើយនោះ។

ដោយសារតែប្រជុំរឿងជាតកដែលយើងរៀបចំនេះមានដល់ទៅ ២៤៦ រឿង និងដើម្បីកុំឲ្យវាក្រាស់ពេក យើងខ្ញុំ
ក៏បំបែកជាពីរភាគ ក្នុង ១ភាគ មាន ១២៣ រឿង និងសូមថ្លែងអំណរគុណដល់ប្រិយមិត្តអ្នកអាន ដែលជួយគាំទ្រ
ដល់ក្រុមផលិតសៀវភៅ ម៉ាញប៊ុក្ស យើងខ្ញុំជារៀងរហូតមក សូមអរគុណ!

ការវាយតំលៃរបស់អ្នកទិញ (1)